martes, 22 de marzo de 2022

A edil de Benestar Social, Eva Martínez Montero, presentou esta mañá ‘Canido en Nomes’ e a web https://canidoennomes.eu acompañada por representantes de entidades do barrio. Partiu dun estudo da historia, patrimonio e evolución urbanística de Canido a través dos seus topónimos e memoria veciñal

O Concello de Ferrol presentou esta mañá o proxecto ‘Canido en Nomes’, unha iniciativa municipal en colaboración con entidades do barrio cuxo fin é recuperar a historia de Canido a través do estudo do seu patrimonio, da súa evolución urbanística e toponimia e a memoria e testemuños dos seus veciños. A concelleira de Patrimonio Histórico, Eva Martínez Montero, deu a coñecer os detalles do proxecto acompañada por Esther Estévez, da asociación Muíño do Vento; Joaquín Enriquez, da asociación de acordeonistas de Canido-Ferrol; Antonio Casal, da asociación Ferrolterra Antiga; e Roberto Taboada, da asociación veciñal de Canido.

A edil anunciou que coincidindo coa celebración dos Maios, a comezos de maio, estarán colocadas as placas que identificarán os 15 espazos que integran a ruta de Canido, todas elas cun código QR que leva á paxina web https://canidoennomes.eu/. Para dita data celebrarase tamén unha ruta teatralizada.

O barrio “é un dos máis vivos da cidade”, explicou a edil, —cada mes de setembro acolle centos de visitantes polo Festival das Meninas de Canido— e agradeceu a colaboración e “excelente participación” de entidades e veciños, “que aportaron fondos e información de gran utilidade”. Na actualidade o proxecto está a avanzar na recollida de testemuños sobre aspectos como o traballo no campo, cultivos, ocio, a infancia ou sobre a evolución do rueiro de Canido. Neste apartado, por exemplo, “traballouse coa entidade Mulleres Bravas de Canido” con planos e cuestionarios sobre o barrio, e nas próximas datas ampliarase a información “grazas á memoria de veciños de outros colectivos”, indicou Martínez Montero.

Para o análise da toponimia estudáronse nomes de rúas e prazas, moitos con referencias a persoeiros. Ademais da ruta, a páxina tamén recolle unha sección de nomes esquecidos, outra con fondos da memoria dos veciños a partir de testemuños e conversas, de cartografía e un apartado de novas sobre, entre outras cuestións. Para dar a coñecer o proxecto ‘Canido en nomes’, ademais da ruta e os códigos QR, contémplase tamén celebrar charlas, conferencias e editar material con información do barrio. O fin, explicou a edil, “e traballar conxuntamente para divulgar e poñer en valor a historia deste barrio”. Taboada agradeceu ao Concello de Ferrol a súa implicación no proxecto e apuntou que se trata dunha iniciativa “viva” á que se irán sumando novas propostas. Pola súa banda, o historiador Casal lembrou que aglutina a “memoria dos seus veciños” a través de distintas “perspectivas”.

O proxecto “Canido en nomes” abriu esta fin de semana a primeira parada dun proxecto que quere recuperar a memoria da veciñanza

ENFOQUES
20 de setembro de 2021

O primeiro dos códigos QR instalouse nas inmediacións da praza de Canido

O proxecto “Canido en nomes”, impulsado pola Asociación Ferrolterra Antiga xunto coa entidade veciñal de Canido e a Asociación Cultural Muíño do Vento, deu esta fin de semana un novo paso no seu afán de recuperar os topónimos e a historia do barrio ferrolán.

O proxecto, presentado o pasado mes de xullo nun acto no que se inaugurou a Canción de Canido, baseado nun poema de Antón Cortizas e interpretado por Joaquín Enríquez e Rocío Rodríguez Padín, estreou o primeiro dos códigos QR que se instalarán polas rúas da barrio para ofrecer unha experiencia interactiva ao visitante. Estes códigos pódense escanear desde teléfonos móbiles para consultar a información relativa ás rúas e lugares do barrio que se compilará na web oficial da ruta.

No acto de colocación deste primeiro código QR participaron representantes das distintas entidades, persoas da “Esquina de Canido” e a concelleira de Patrimonio Histórico do Concello de Ferrol, Eva Martínez Montero, quen cualificaron o proxecto de “importante para non recuperar só o patrimonio histórico, senón a nosa memoria histórica e cotiá de como era a vida no barrio” e amosou a vontade do Concello de “construír lazos de apoio con este tipo de proxectos”.